Mrs.Ansari (Kenya )

 

حضرت عثمان غنی رضی اللہ عنہ کا لقب ذوالنورین ہے جس کا مطلب دو نوروں والا اس لقب کی وجہ سنن کبری للبیہقی میں ہے کہ آپ رضی اللہ عنہ کے عقد میں آپ صلی اللہ علیہ وآلہ وسلم کی دو بیٹیاں تھیں تو سوال یہ ہے کہ کیا آپ صلی اللہ علیہ وآلہ وسلم کی بیٹیاں نور تھیں؟ کہ جس بنا پر یہ لقب ملا کیا وجہ ہے کہ ذوالنورین لقب کیو کس بنا پر بولا جاتا ہے؟ جواب درکار ہے

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

اسلام کے تیسرے خلیفہ، داماد رسولﷺ اور جامع قرآن حضرت عثمان بن عفان اموی قرشی (47 ق ھ - 35 ھ / 576ء – 656ء) عشرہ مبشرہ میں سے تھے، ان کا لقب ذو النورین ہے کیونکہ انھوں نے محمد صلی اللہ علیہ وسلم کی دو صاحبزادیوں سے نکاح کیا تھا ، پہلے رقیہ بنت محمد سے آپؓ کا نکاح ہوا ، پھر ان کی وفات کے بعد ام کلثوم بنت محمد سے نکاح کیا ۔ اسی لیے انہیں ذوالنورین کا لقب ملا جس کے معنی ہیں دو نور والے ، دو نور سے مراد نبی کریمﷺ کی دونوں صاحبزادیوں کا یکے بعد دیگرے آپ کے نکاح میں آنا ہے ۔

واضح ہو یہاں نور سے مراد روشنیاں نہیں ہیں بلکہ ایک تمثیل ہے ، جیسا کہ ہم اپنی زندگیوں میں بھی ان صیغوں کو اپنی اولادوں کے لیے تمثیلاً استعمال کرتے ہیں ۔ جیسے جگر گوشہ ، جگر کا ٹکڑا ، دل کا ٹکڑا تو مراد گوشت کے بنے جگر یا دل کے کٹے ہوئے ٹکڑے نہیں بلکہ یہ ہماری محبت کی شدت ہوتی ہے جسے ہم کسی ایسی چیز سے تشبیہ دیتے ہیں جو جسم کا اہم حصہ ہوتی ہے ، ایسا بھی نہیں کہ جسم کے ہر حصہ پر اولاد کو تشبیہ دیں ، مثلاً ہم یہ نہیں کہیں گے کہ میرا بیٹا میرے ہاتھ کا انگوٹھا ، میرا کان یا میرا پاوں۔۔۔۔۔ اسی طرح اولاد کو آنکھوں کی ٹھنڈک سے تشبیہ دی جاتی ہے ، یا آنکھوں کا نور کہا جاتا ہے ، تو اس سے مراد روشنی نہیں ہوتی ۔

ذوالنورین یعنی دو نور والے ، دامادِ رسولﷺ حضرت عثمان رضی اللہ عنہ ، نبی کریمﷺ کی دو پیاری بیٹیوں ، نورِ نظر یعنی آنکھوں کا نور سیدہ رقیہ رضی اللہ عنہ اور حضرت ام کلثوم رضی اللہ عنہ کے شوہر تھے ۔

فقط واللہ تعالیٰ اعلم بالصواب

ALQURAN O HADITHS♥➤WITH MRS. ANSARI

اِنْ اُرِیْدُ اِلَّا الْاِصْلَاح مَا اسْتَطَعْتُ وَمَا تَوْفِیْقِیْ اِلَّا بِاللّٰہِ

وَصَلَّی اللّٰہُ عَلٰی نَبِیَّنَا مُحَمَّدٍ وَآلِہ وَصَحْبِہ وَسَلَّمَ وعلى آله وأصحابه وأتباعه بإحسان إلى يوم الدين۔

ھٰذٙا مٙا عِنْدِی وٙاللہُ تٙعٙالیٰ اٙعْلٙمْ بِالصّٙوٙاب